Dusht Bhediya Aur Tuntuni Chidiya Ke 7 Bachche
Sundarvan mein Tuntuni chidiya apne 7 bachchon ke sath rehti thi. Wo apne bachchon se bahut pyar karti thi. Ek din jab Tuntuni bhojan ki talash mein ja rahi thi tab usne apne bachchon ko samjhaya. “Bacchon, jab tak main na aaun tab tak tum log darwaza mat kholna. Apni maa ki ye baten sunkar Tuntuni ki badi beti usse puchti hai, “Mama, jab aap aaoge tab hum log aapko kaise pehchanenge?” Tuntuni kehti hai, “Bacchon, jab main aaungi tab ek gana gaungi use sunkar tum log darwaza kholna.”
“Darwaza kholo bachchon, mamma hai aayi; are jaldi kholo khana mazedar hai layi.” Bachchon ne kaha, “Theek hai mamma ab jao hum log aapke aane per ye gana sunkar hi darwaza kholenge.”
Is tarah Tuntuni apne bachchon ko samjha kar apne ghar se bhojan ki talash mein chali jaati hai. Tuntuni jab apne bachchon se ye baatein kar rahi thi tabhi ek chalaak bhediya uski baaton ko sun raha tha. Tuntuni ke jaane ke thodi der bad wo Tuntuni ka darwaza khat-khatata hai.
“Bachchon, darwaza kholo mamma aa gayi.” Tuntuni ke bachche kehte hain, “Nahin, hum log darwaza nahin kholenge. Aap meri mamma nahin ho meri mamma gaana gane wali thi. Jab wo gana gayegi tabhi hum log darwaza kholenge.” Bacchon ki baatein sunkar vah bhediya turant gana shuru kar deta hai.
“Darwaza kholo bachchon mamma hai aayi: are jaldi kholo khana majedar hai layi.” Bachche darwaza kholne hi ja rahe the tabhi Tuntuni ki badi beti Rano use rokti hai, Rano ye hmari maa nhi ho sakti humari maa to bahut meetha gaati hai.
Tuntuni ke bacche kehate hain, “Nahin hum log darwaza nahin kholenge aap hamari mamma nahin ho aapki aawaj bhut hi besuri hai.” Ye sunkar bhediya sochta hai, “Ye Tuntuni ke bacche to bahut hi hoshiyar hain, mujhe kuchh karna hoga.”
Phir wo bhediya jungle ke andar jata hai aur ek shahad ke chhatte se shahad pi leta hai aur phir se Tuntuni ke darwaze par khushi-khushi jata hai aur darwaze ko khat-khatata hai, “Darwaza kholo mere bachcho, mamma hai aayi; are jaldi kholo khana mazedar hai layi.”
Is bar Tuntuni ke bacche darwaza khol dete hain aur wo bhediya ghar ke andar aa jata hai. Bhediye ko dekhkar Tuntuni ke bachche dar jaate hain aur idhar-udhar chhipne lagte hain lekin wo bhediya sabhi bachchon ko pakad kar ek bori me dal deta hai. Lekin us bhediye se bachkar ek bachcha almirah ke pichhe chhip jata hai.
Thodi der bad jab Tuntuni ghar aati hai to apne bachchon ko na pakar zor-zor se rone lagti hai.
Apni maa ko rota hua dekhkar wo bachcha almirah ke piche se bahar aata hai aur apni maa ko sari baat batata hai. “Mama ek bhediya aaya tha usne sabhi ko apne bori mein dalkar le gaya.” Apne bacche ki yah baat sunkar Tuntuni dar jaati hai aur wo bhediye ki talash mein nikal jaati hai.
Thodi door jaane per hi wo bhediya sota hua Tuntuni ko milta hai aur pass mein hi bori bhi rakhi hui thi jismein Tuntuni ke bachche band the. Bhediya gehri nind mein so raha tha. Tuntuni jaldi-jaldi apne bachchon ko bori se nikalti hai aur uske bori mein pat-thar bhar deti hai.
Thodi der bad jab bhediye ki nind khulti hai tab wo bori ko uthakar nadi paar karne lagta hai. Lekin pat-thar ki wajah se vo bori jyada bhari ho gayi thi. Bhediye ka santulan bigadata hai aur vo nadi mein bori ke sath gir jata hai aur usi nadi mein doob kar mar jata hai.
Ye sab dekhkar Tuntuni aur uske bacche bahut khush hote hain, jo ki pass ke ek ped per baithkar bhediye ke jaane ka intezar kar rahe the. Fir Tuntuni apne sabhi bachchon ko lekar ghar laut aati hai aur khushi-khushi rehne lagti hai.